ჩოხატაურის სოფლებში ფაროსანას საწინააღმდეგო შეწამვლა მიმდინარეობს
ჩოხატაურის მუნიციპალიტეტში, თერმული ნისლით შეწამვლის პროცესი ყველა სოფელში დაიწყო. სამუშაოებში ჩართულია 62 ერთეული სპეციალური ტექნიკა. ღონისძიებების მიზანია მავნებლის მოზამთრე ფაზის რიცხოვნობის შემცირება.
შეწამვლით სამუშაოებს კოორდინირებას უწევენ აზიურ ფაროსანასთან ბრძოლის საკოორდინაციო შტაბის წევრები, სურსათის ეროვნული სააგენტოს სპეციალისტები, მხარისა და ადგილობრივი ხელისუფლების წარმომადგენლები.
გურიის გუბერნატორმა ზურაბ ნასარაიამ ხაზგასმით აღნიშნა, რომ მავნებლის საწინააღმდეგო ღონისძიებები ინტენსიურად მიმდინარეობს, რაშიც სახელმწიფო სტრუქტურები, სურსათის ეროვნული სააგენტო, ადგილობრივი მუნიციპალიტეტები აქტიურად არიან ჩართულნი.
" სახელმწიფო აგრძელებს მავნებლის საწინააღმდეგო ღონისძიებებს და მაქსიმალური შედეგების მისაღწევად მნიშვნელოვანია კოორდინირებული მიდგომა და მოსახლეობის ჩართულობაც" - განაცხადა ზურაბ ნასარაიამ.
