სიახლეები

გურიას ისრაელის ელჩი საქართველოში შაბთაი ცური ეწვია

2018-05-28 20:26:00

გურიის გუბერნატორი მერაბ ჭანუყვაძე, ჩოხატაურის მუნიციპალიტეტის მერთან ირაკლი კუჭავასთან ერთად, ისრაელის საგანგებო და სრულუფლებიან ელჩს საქართველოში შაბთაი ცურს შეხვდა. შეხვედრაზე ორმხრივი თანამშრომლობის საკითხები და სამომავლო პერსპექტივები განიხილეს.

“განვიხილეთ გურიის რეგიონში ტურიზმის კუთხით არსებული აქტუალური საკითხები. მიმდინარეობს მოლაპარაკებები ჩოხატაურის მუნიციპალიტეტსა და ისრაელის ერთ-ერთ ქალაქთან დამეგობრებაზე. ჩვენ, სექტემბრის თვეში, ისრაელის დელეგაციასთან ვგეგმავთ კიდევ ერთ შეხვედრას, სადაც გადაწყდება კონკრეტული ქალაქი, რომელიც ჩოხატაურის მუნიციპალიტეტს დაუმეგობრდება. შევთანხმდით კოორდინირებულ მუშაობასა და მჭიდრო თანამშრომლობაზე“- განაცხადა გუბერნატორმა.

შეხვედრის შემდეგ მხარეებმა დაბა ჩოხატაურში სასტუმრო „პაგიო“ გახსნეს, რომლის ინვესტიციაც 250 000 ლარს შეადგენს. სასტუმროში დასაქმებულია ადგილობრივები.

მოგვიანებით სტუმრები ჩოხატაურის სპორტისა და სპორტულ ღონისძიებათა ორგანიზების ცენტრში გამართულ ჭიდაობის ტურნირს დაესწრნენ, რომელიც მიეძღვნა საქართველოსა და ისრაელის დამოუკიდებლობისათვის ბრძოლაში დაღუპულთა ხსოვნას.